يمسكم بالخير…
هاظ يا سادة يا كرام مبارح غزة دخلت المستوى الجديد من “عميان القلب” حيث إنو جرافة من جرافات العدو البغيض مزعت السلك اللي بوصل شبكة الاتصالات في غزة و الناتج كانت غرق غزة بظلام معرفي من التلفون و خط الموبايل و الانترنت و انتج الإشي عن هبوط حاد بال”لايكس” على الفيس بوك، و انهيار اعداد التويتات في غزة، و بديش أحكيكلكم عن الخسائر العملاقة عند القهاوي لعدم قدرة الناس على التلفنة و التنسيق للطلعة، و في بعض المناطق في غزة عاشوا تجربة الموت السريري حيث عانوا من قطع (الكهرباء- الماء – الاتصالات – الاتصالات اللاسلكية – الانترنت) بس بحب اطمنكم إنو صحيوا اليوم بشكل متقطع و إكتشوا إنو سبب عطشهم ما كان قطعة المي على قد نشفان الريق من السب على اللي كان السبب…
و شعب غزة بحب يعتذر و يبدي أسفه الشديد على فقدانة القدرة على متابعة مسلسلات رمضان مبارح و بوعد منتجين العالم إنو يبذل قصاره جهده إنو يعرف إيش صار أو ينزل الحلقات الفايتة لما يتأكد خبر رجوع الانترنت بالسلامة و استقراره عشان الكوتة بتاعت الانترنت مش ينزل و يفصل!
و بحب كمان أنوه على باقي المصايب في غزة من انقطاع الدواء و رفع الاسعار و أزمة المعابر و غيرو و غيراتوا و بحكي للمسؤولين عنهم…لو كانت الأشياء هادي الها سلك كان عرفتوا تبرروها…
رمضان كريم و اللهم إني صائم!
بحكيلكم غزة تتحدى الملل والواحد عمره ما يزهق منها