تررم تررم…تررم تررم (يدق جرس الهاتف بإصرار)
غ(غزة): الو…
ض(ضفة): مرحبا..شو وينكو تأخرتو عن الإجتماع الفيديو لنك؟
غ: لسة ضايلو ساعة.!
ض: كيف ساعة هيو بدو يبدأ !
غ: هو كام الساعة عندكو ؟
ض: الساعة 11
غ: لا يمة الساعة 10..هو مكتوب عندك امتى؟
ض: الساعة التاسعة غرينتش…
غ: ينعن غرينتش..يعني الساعة تمنية عنا
ض: و العمل ؟
غ: والله منا عارف…هو إيش اليوم عندكو؟
ض: السبت…بالله تكونو زينا!
غ: هو اه لسة الدنيا السبت…لحد الآن!
بحب أحكيلكوا انو اذا ما تغير الموضوع فهادا الحوار حيكون من الحوارات اليومية في مجتمعنا الفلسطيني (كائن مستقبلي منفصم الشخصية يحمل أربع الوان ظاهراً و لونان باطناً يتكلم العديد من اللغات ولا يجيد الاستماع لأي لغة).
مع خبر تغيير الساعة بالضفة و ثباتها في غزة…أفكار كتيرة بتيجي على بال المواطن زي إنو اذا ما اتفقنا على البيديهيات و قوانين الطبيعة زي الليل و النهار والساعة، يكف ممكن يقنعونا انو فيه توافق و اتفاق على المواضيع الكبيرة و الثوابت و الوطنية و اسعار البتجان في غرفة الخضار الفلسطينية…
زي ما صديقة داينا بتحكيلي انو كلامي بنقطع في نص التدوينة و الفكرة بتكون في كتير من الأحيان ناقصة، انا شايق انو حقيقتنا صارت منقوصة و ناقصة، و للأسف الجانب الآخر من المعادلة غايب تماما انو يكملي كلامي و لو حتى فاضي…فللأسف بحكي بصوت كتير من الناس لما أحكي انو مع الأحداث الأخيرة في غزة الكل شعر انو مصر و الأردن أقرب الى غزة من نصفها الآخر…
كلامي رح يتعرض عليه الكثير و رح يشككو فيه و يتهموني بالفرقة و اني فيا مدسوس بحب الخروب ما بحب السوس و هادي الأشياء…بحب أحكي انو العتب على قد المحبة و فيه حد ما بحب أخوه ؟؟
بتمنى نتذكر بالنهاية انو الأشياء اللي بتجمعنا كتير أكترمن الأشياء اللي بتفرقنا…و بما انو احنا شعب فلسطيني و لسة فيه ناس متيسة تخلي الوضع كما هو عليه…رح نلاقي طريقة نعدي فيها هلوضع…
احنا شاطرين باتصليح الوضع…
الله لا يجيب وضع!
0 Responses to “مع فارق التوقيت…”